无线重头剧之一《殭》4月11号已经开播，目前虽然先播左两集，但已经在网上引起热议！
套剧以僵尸为主题，少不免令众多网友回想香港神剧之一的《我和僵尸有个约会》，唔少网友都寄望会拍返当年质素。至于最终会拍成点，会唔会成为又一神剧就暂时系未知之数。
不过就目前两集来睇，就已经有唔少吐槽点，睇来成为雷剧反而更有可能？
1大玩食字位
TVB 剧集人名玩开食字就见怪不怪，但今次《殭》嘅玩法可以话系出神入化！今次由人名到剧情细节都唔放过，食字程度仲俾网友话似用咗中二病（此词来自日本，意指以夸张嘅虚幻世界套到现实中）命名法，劲似以前中学时期睇开嘅网络言情小说，肉麻到呢！
“中二病”角色名
由郑嘉颖饰演嘅不死人叫刑活着，系未寓意指仍然活着？陈嘉宝、黄又南两兄妹又叫何年同何月，谢安琪、陈凯琳两姊妹一个叫蓝梦南，一个叫蓝梦瑶，似足旧时啲言情小说女主角名，仲未计罗兰姐叫黄紫红、陈山聪叫凌风、秦煌叫拜金坚……妈啊，听到都起晒鸡皮啦！
食字细节位
说话原来郑嘉颖喺剧中主理一间餐厅，而呢间餐厅名叫「夜唔夜」……即刻令网友谂起万梓良喺《专钓大鑩》嘅金句……
另外，原来剧中郑嘉颖亦系有一间专以训练杀僵尸门派嘅大佬，而呢个门派竟然系叫随意门……TVB你有无俾返版权钱多啦A梦啊？
2左抄右抄同类剧？
《殭》宣传片推出后，就已经俾网友话丧炒过往同类剧集。其实，剧集故事嘅嘢又有咩话抄唔抄呀……小编觉得，都系如有雷同，实属巧合……只系今次巧合嘅地方就比较多……
同《我和僵尸有个约会》人物设定相似
睇返人物对照，就会发现《殭》同《我》嘅人物设定有异曲同功之妙之处，郑嘉颖嘅刑活着角色同尹天照喺《我》嘅况天佑两个都系由古代嚟到现代，一个喺明朝，一个就喺民初时期；另外两个都有与各个角色之间的聚脚点，一个系深宵食堂，一个系酒吧，同样比人倾计聚会！再者，两个角色功能都系不死人＋砍妖除魔！
另外，二人亦总有几个跟班帮手做嘢。《殭》就以陈嘉宝、黄又南同陆永为郑嘉颖嘅入门弟子；《我》就以况家几代僵尸「帮拖」。
而且，两剧都总有个搞笑角色！当年《我》就有杜汶泽饰演嘅金正中做谐角；《殭》就有陆永做简霆斯为套剧营造搞笑气氛。唔知陆永发放笑弹拍住得当年嘅杜汶泽呢？
同埋当年《我》嘅马小玲出身嘅马家同《殭》嘅「随意门」又系好类似，又系有班人誓言要消灭僵尸……
抄足美剧《点到即止》特异功能
女神Kay饰演嘅女僵尸角色有一个名为「一指灵」嘅特异功能，只要指一指尸体，就可以令尸体苏醒一分钟。而于2010年喺明珠台播过美剧《点到即止》（Pushing Daisies）嘅主角又系可以指一指就令人起死回生一分钟，小编估，都系咁啱……挂。
深宵食堂VS《深夜食堂》？
剧目讲到明为郑嘉颖开间《夜唔夜》系深宵食堂，睇返啲场境同日本电影《深夜食堂》做比较，嗱！咪话一样呀，上下两张图系唔同㗎，真系咁「巧合」㗎咋！
3千篇一律关系图
《殭》除咗讲僵尸线，男女感情线紧系唔少得，咪以为呢套剧有个咁创新嘅题材就会有复杂而深层次嘅人物关系呀，事关心水清嘅观众应该一睇无线出嘅人物关系图，应该就会推算到关系发展，咪就系都系A钟意B，B又暗恋C，C又钟意A，呢啲不变公式，唔明讲紧咩？睇吓下面两个框就明啦！
讲左咁多槽点，其实小编就觉得《殭》同内地的真·雷剧比简直就系小巫见大巫！所以如果自觉抗雷打击能力不错的话，都可以用来打发时间。最起码，剧里面啲荷兰外景都真系靓啊~
欢 迎 关 注 新 假 期 微 信 公 众 号：WeekendWeeklyHK
